- Rin, rin!
- Alo?
- Kaixo! Benta ondoko kabina zaharra naiz!
Agian ez nauzu ikusi ere egin, baina beste telefono-kabina abandonatu asko bezala, urteak daramatzat geldirik eta berriro erabilgarria izateko gogoa dut. Pertsonak berriro komunikatu eta konektatu nahi ditut, horretarako sortu bainintzen. Auzoaren zerbitzura jarri nahi nuke eta nire asmo berria zein izan daitekeen ikusi. Lagunduko didazu?
Bentatik, ekintza kolektibo txiki batera gonbidatzen zaituztegu, kabinaren eta auzoaren arteko lotura eta komunikazio edukia birpentsatzeko:
Zer esan nahi diogu auzoari? Zer partekatu nahi dugu auzokideok?
Kabinaren funtzionaltasun berria definitzeko dinamika txiki bat proposatzen dizuegu, eta, ondoren, kabinak espazio berritu batean esku hartzea, guk geuk eraldatu eta eduki berri hori emateko. Azkenik, gure lorpena ospatzen dugu igandeko une tipiko batekin: marianitoa eta olibak!
Benta inguruko pertsona guztiei irekitako ekintza da, ez dago ez mugarik, ez adinik! eta parte-hartzea maila desberdinetan izan daiteke, pertsona bakoitza erosoago sentitzeko.
Ekitaldia Bentatik antolatu da Jon Abad eta Iker Abad (Abad Design), ColaBoraBora-tik Leire García eta Monica Deu Muñoz kolaboratzaileen laguntzarekin.
Baita Bentako boluntario guztien eguneroko lanari esker ere.
Bentan itxarongo zaituztegu jarduera honetarako eta gainontzekoetarako!
