Seeds for Regeneration
Seeds for Regeneration topaketa profesionala da, diseinuan lan egiten dutenen eta biziberritze-arloko nazioarteko bi erreferenteren (Jan Boelen eta Jenny Andersson) arteko hurbileko harremanak eraikitzeko sortua.
Jan Boelen komisario eta diseinatzaile belgikarrak Atelier Luma zuzentzen du, Arlesen (Frantzia) kokatutako laborategi aitzindari bat, diseinuak lurraldeen trantsizio ekologikoa nola aktibatu dezakeen aztertzen duena, sormena, ikerketa eta komunitatea lotuz.
Jenny Andersson-ek, Erresuma Batuan oinarria duen estratega suediarrak, Really Regenerative Centre sortu zuen, eta, bertatik, lidergo-prozesuak eta etorkizun justu eta erresilienteagoetarako trantsizioa bultzatzen ditu, Europa osoko hiri, erakunde eta gizarte-mugimenduekin lan eginez.
Topaketa hau ez da inspirazio-gune bat soilik, loturak eta aliantzak sortzeko aukera bat ere bada —tokikoak eta nazioartekoak—, Bizkaiko diseinuaren ekosistema indartzeko eta begirada biziberritzailea finkatzeko, eraldaketa ekosozialaren eragile gisa.
Seeds for Regeneration Biotic Cities Lab / Hiri Biotikoak / Ciudades Bióticas proiektuaren parte da; Pez Estudiok bultzatua eta Eusko Jaurlaritzako Kultura eta Hizkuntza Politika Sailak finantzatua.
Topaketa hau ingelesez egingo da, itzulpenik gabe.
Jenny Andersson biziberritze-diseinuko eta -garapeneko profesional ezaguna da. Really Regenerative CIC sortu zuen 2020an, eta tokiaren potentzial fraktalaren zale amorratua da, ekonomia, ekologia eta kultura etorkizun biziberritzailerantz eraldatzeko nodo kritiko gisa. Really Regenerative CICen bidez, 3.800 milioi urtean bizitzeko baldintza egokiak sortu dituzten printzipioek inspiratuta, giza sistema ekonomiko eta kulturalak printzipio horiekin birlerrokatu nahi dira, tokitik abiatuta. Izan auzo, hiri edo bioeskualde mailan. Aldaketaren teoriak honako hauek barne hartzen ditu: tokiaren potentzial ebolutiboa garatzea; Bizitzarako Zentroak sortzea, aldaketa eraldatzailearen bideari eusten dioten erakunde biziak; Praktika Biziberritzailea, aldaketa eraldatzailerako kudeaketa-prozesuak aplikatzen ikastean datzana, elkarrekin lan eginez etorkizun biziberritzaile baterantz.
Jan Boelen (1967, Belgika) diseinu, arkitektura eta arte garaikideko komisarioa da. Atelier LUMAko zuzendari artistikoa da, bio-eskualde bat ekoizteko eta zaintzeko modu berriak elkarrekin garatzea bilatzen duen plataforma esperimentala, diseinua trantsizio ekologiko eta sozialerako tresna gisa erabiliz. Boelenek Produktu Diseinua ikasi zuen Genken, eta Belgikako Hasselt-eko Z33 Arte Garaikideko Etxearen sortzaile eta zuzendari artistiko ohia da. Eindhoven-eko Diseinu Akademiako Gizarte Diseinuko Masterraren sortzailea izan zen 2020ra arte, eta Karlsruhe-ko Arte eta Diseinu Unibertsitateko errektorea 2019tik 2023ra arte. 2014an, BIO50 Liublianako (Eslovenia) diseinu-bienaleko komisario izan zen. Istanbulgo IV. Diseinu Bienaleko komisarioa izan zen (2018) eta Manifesta 9 bultzatu zuen Belgikan (2012). Azkenik, Boelenek Lituaniako Planet of People pabiloia komisariatu zuen Veneziako Arkitektura Bienalean (2021).
Urteetan zehar, proiektuak eta erakusketak sortu ditu, bisitaria eguneroko objektuei modu berritzailean begiratzera animatzeko. Boelenek Social Matter, Social Design: For Good or Bad, all Design is Social (Valiz, 2020), Muller Van Severen: Dialogue (Walther Koenig, 2021) eta Atelier Luma, Bioregional design practices (Luma, 2023) editatu berri ditu. Bere idatzietan diseinuak eguneroko bizitzan dituen inplikazioak eta praktika artistikoek diziplinari nola forma eman diezaioketen azaltzen du.
Pez Estudio BBDW25ko komisario diren emakume arkitektoen taldea da. 2006tik, diseinu-, arkitektura-, hirigintza- eta ikerkuntza-proiektuak garatzen dituzte, ikuspegi ekologiko, sozial, parte-hartzaile eta berritzailearekin. Pertsonek ingurumenean duten eragina minimizatzea, hiri inklusiboagoak garatzea, sistema biologiko eta material naturalak erabiltzea eta lankidetza-testuinguruak sortzea sustatzen dute.
Nazioarteko mailan aitortu eta saritu dute haien lana Arquia Proxima, Karibeko Arkitektura Bienala, Santo Domingoko Arkitektura Bienala edo Holcim Awards Fundazioa bezalako erakundeek. Nazioarteko hainbat erakunde eta programatan egin dute lan, hala nola Veneziako Arkitektura Bienalean, New Yorkeko MoMAn, Shenzhengo Arkitektura Bienalean, Medialab-Pradon eta Intermediae Matadero Madriden.
Elisa de los Reyes García arkitektoa da eta Pez Estudio, Bilboko Wikitoki Elkarlaneko Praktiken laborategia eta Inteligencias Colectivos/Zoohaus proiektuaren sortzaileetako bat. IED Kunsthaleko Service Design Masterreko irakaslea da. Hitzaldiak eta workshopak egin ditu Europa eta Amerikan (Parsons The New School NY, MoMA NY, Matadero Madrid, Medialab Prado, CCE Liman, Santo Domingo, Txilen eta abar).
